अगोदर महाराष्ट्र सांभाळा, आमची चिंता करू नका : योगी आदित्यनाथांचा राऊतांवर निशाणा

 

वृत्तसंस्था : सहकारनामा ऑनलाईन

यूपीच्या अनुपशहर भागातील पगोना गावामध्ये दोन साधूंच्या झालेल्या हत्येनंतर आता राजकीय वातावरण चांगलेच तापल्याचे दिसत आहे. महाराष्ट्राच्या मुख्यमंत्र्यांनी आणि खासदार संजय राऊतांनी या घटनेचा निषेध करत या घटनेवर प्रतिक्रीया देताना पालघरच्या घटनेचा दाखला देत योगी आदित्यनाथ यांच्या सरकारला याबाबत ठणकावले होते. आता खा. संजय राऊत यांच्या आरोपाला मुख्यमंत्री योगी आदित्यनाथ यांच्या कार्यालयाद्वारे ट्विट करण्यात आले असून त्यामध्ये संजय राऊतांवर निशाणा साधण्यात आला असून महाराष्ट्र सांभाळा उत्तर प्रदेशची चिंता करु नका अशा शब्दांत योगी आदित्यनाथ यांनी संजय राऊत यांना ट्विटरवरून खडसावलं आहे.

 पुढे या ट्विटमध्ये उत्तर प्रदेशात कायद्याचं राज्य आहे साधूंच्या हत्येच्या घटनेनंतर अवघ्या काही तासांमध्येच आरोपीला अटक करण्यात आलेली आहे.असा मजकूर देण्यात आला असून पालघर मधील साधुंच्या हत्येबद्दल कोण राजकारण करत आहे असा सवालही मुख्यमंत्री आदित्यनाथ यांनी खासदार संजय राऊत यांना विचारला आहे.