थेऊर : सहकारनामा ऑनलाईन (शरद पुजारी)
वाघोली परिसरातील एका बांधकाम साईटवरील घराचा कडी कोयंडा तोडून घरातील दोन मोबाईल व एक ब्लु टुथ सेट अज्ञात चोरट्याने पळवला होता या प्रकरणी एका सराईत चोरट्यास लोणीकंद पोलिसांनी अटक केली आहे.
लोणीकंद पोलिसांनी दिलेल्या माहितीनुसार दीपक छोटुराम दास वय 21 वर्षे, रा. गाडे वस्ती, वाघोली, पुणे हे काम करीत असलेल्या बांधकामाचे ठिकाणी त्यांना राहण्यासाठी बनवलेल्या खोलीत राहतात.ते कामानिमित्त बाहेर गेल्यानंतर घराचा कडी कोयंडा उचकटून घरातील दोन मोबाईल व एक ब्लूटूथ असा एकूण 18,290 रु किंमतीचा माल चोरुन नेला अशी फिर्याद लोणीकंद पोलिस स्टेशनमध्ये दाखल करण्यात आली.
यावर गुन्हे प्रकटीकरण पथकाने तात्काळ घटनास्थळी भेट देऊन सर्व हकीकत समजून घेऊन गुन्ह्याचा तपास सुरू केला.गुन्हे शाखेने लोणीकंद पोलीस ठाणे हद्दीतील रेकॉर्डवरील सर्व आरोपीची तपासणी केली तेव्हा सुमन उर्फ शिवा शंभू चक्रवर्ती वय 21 वर्षे, रा. आय व्ही इस्टेट लेबर कॅम्प, वाघोली, पुणे मूळ- कलकत्ता यास वाघोली येथे ताब्यात घेतले. त्याच्याकडे या गुन्ह्यासंदर्भात चौकशी केली असता त्याच्याकडे एक पल्सर गाडी व 03 मोबाईल व ब्लूटूथ असा एकूण 63,490 रु किंमतीचा मुद्देमाल सापडला. याबाबत त्याच्याकडे अधिक चौकशी केली असता त्याने गाडी व मोबाईल हे चोरीचे असल्याचे सांगितले.यातील मोबाईलबाबत लोणीकंद पोलीस ठाणे व पल्सर गाडीबाबत येरवडा पोलीस ठाणे येथे वाहन चोरीचा गुन्हा दाखल आहे.त्याच्यावर यापूर्वी देखील लोणीकंद पोलीस ठाणे येथे वाहन चोरीचा गुन्हा दाखल होता.
ही कारवाई डॉ. सई भोरे पाटील (उपविभागीय पोलीस अधिकारी हवेली विभाग), प्रताप मानकर (पोलीस निरीक्षक) यांच्या मार्गदर्शनाखाली हणमंत पडळकर (पोलीस उपनिरीक्षक), बाळासाहेब सकाटे, श्रीमंत होनमाणे, संतोष मारकड, दत्ता काळे, समीर पिलाने, ऋषिकेश व्यवहारे, सुरज वळेकर यांनी केली आहे
