डॉ.बाबासाहेब आंबेडकरांच्या ऐतिहासिक ‛राजगृहात’ तोडफोड, अजित पवारांचा कडक शब्दांत इशारा

मुंबई : सहकारनामा ऑनलाईन

भारतरत्न डॉ. बाबासाहेब आंबेडकर यांच्या मुंबईतील ऐतिहासिक महत्त्वाच्या ‘राजगृह’ निवासस्थानी झालेली तोडफोडीची घटना घडली आहे. 

या घटनेनंतर राज्याचे उपमुख्यमंत्री अजित पवार यांनी तीव्र शब्दात याचा निषेध नोंदवत समाज कंटकांवर कारवाई करण्याचे आदेश दिले आहेत.

अजित पवार यांनी याबाबत ही घटना अत्यंत निषेधार्हं असून हे समाजविघातक विकृत मानसिकतेचं दुष्कृत्य आहे. राज्य शासनानं घटनेची गंभीर दखल घेतली असून पोलिसांनी तत्काळ घटनास्थळी पोहोचून तपासकार्य सुरू केलंय. महामानव डॉ. बाबासाहेब आंबेडकरांचे कार्य आणि विचार समाजमनात खोलवर रुजले आहेत. आपल्या सर्वांची त्यांच्यावर भक्कम श्रद्धा आहे, त्या श्रद्धेला कुणीही धक्का लावू शकत नाही. आरोपींना लवकरात लवकर शोधून त्यांच्यावर कठोर कारवाई करण्यात येईल. नागरिकांनी असं दुष्कृत्य करणाऱ्या समाजविघातक शक्तींच्या कुहेतूला बळी पडू नये. शांतता, संयम पाळावा, एकजूट कायम ठेवावी, असं आवाहन केलं आहे.