दौंड : दौंड तालुक्यातील जिल्हा परिषद आणि पंचायत समिती निवडणुकीचा प्रचार आता शिगेला पोहोचला आहे. प्रत्येक उमेदवार हा आपापल्या परीने प्रचार करताना दिसत आहे. सर्वाधिक लक्ष लागून राहिलेल्या बोरिपार्धी – केडगाव गटात अभिषेक थोरात विरुद्ध तुषार थोरात यांच्यात रोमहर्षक लढत पहायला मिळत आहे.
मात्र या निवडणुकीत आता काही नविन गोष्टी घडताना दिसत आहेत. जे आजपर्यंत घडले नाही ते आत्ता घडू लागले आहे. खुटबाव हा माजी आमदार रमेश थोरात यांचा बालेकिल्ला मानला जातो. या ठिकाणी शक्यतो विरोधी उमेदवार प्रचार करताना दहावेळा विचार करतो मात्र अभिषेक आनंद थोरात या उमेदवाराने थेट रमेश थोरात यांच्या बालेकिल्ल्यात येउन प्रचारच केला नाही तर लोकांचे ‘विजयी भव’ चे आशीर्वादही घेतल्याचे दिसत आहे.
जेष्ठ दिसले की आदराने चरण स्पर्श करणे आणि युवक दिसले की त्यांना मैत्रीची मिठी मारून त्यांच्याशी दिलखुलास गप्पा मारणे अश्या या अभिषेक थोरात यांच्या कृतीने अनेकांची मने जिंकली आहेत. अभिषेक थोरात हे बोरिपार्धी ग्रामपंचायत चे सदस्य असून त्यांनी आपल्या कार्यकाळात या परिसरात विविध विकासकामांना प्राधान्य दिले आहे.
या निवडणुकीत अभिषेक थोरात यांच्या रुपाने तुषार थोरात यांच्यापुढे मोठे आव्हान उभे राहिले आहे. सहज, सोप्पी वाटणारी निवडणूक अभिषेक थोरात यांच्या एंट्री ने अतिशय चूरशीची बनली आहे. नेमकं कोण विजयी होईल हे सांगणे भल्या भल्यांना अवघड होऊन बसले असून संपूर्ण तालुक्याचे या लढतीकडे लक्ष लागून राहिले आहे.
