सहकारनामा
दौंड : उच्च न्यायालय विधीसेवा समिती मुंबई यांनी निर्देशीत केल्यावरून सोमवार (दि २०) रोजी मळद (ता. दौड ) येथे मोबाईल लोकअदालतीचे आयोजन करण्यात आलेले आहे. या लोकन्यायालयात तडजोड होण्याजोगी फौजदारी प्रकरणे, दिवाणी दावे, ग्रामपंचायत यांचेकडील दाखलपूर्व प्रकरणे ठेवण्यात येणार आहेत.
तसेच मंगळवारी (दि २१) रोजी सकाळी ९ वाजता फिरंगाई माता हायस्कूल, कुरकुंभ येथे कायदेविषयक शिबिराचे आयोजन करण्यात आलेले आहे. या लोकअदालत व विधी साक्षरता शिबीरासाठी निवृत्त जिल्हा न्यायाधीश डी. डी. कांबळे, हे प्रमुख पॅनल जज म्हणून काम पाहणार आहेत.
तरी मळद, कुरकुंभ व लगतच्या गावातील पक्षकार व ग्रामस्थांनी याची नोंद घ्यावी व सदर मोबाईल लोक अदालतीमध्ये व कायदेविषयक शिबीरामध्ये जास्तीत जास्त नागरिकांनी सहभाग घ्यावा असे आवाहन दौंड येथील दिवाणी व फौजदारी न्यायालयाचे मुख्य न्यायाधीश जे. बी. गोयल यांनी केले आहे.
