दौंड : दौंड तालुक्यातील केडगाव (गावठाण) येथे पाण्यावाचून अक्षरशा नागरिकांचे हाल होताना दिसत आहे. गेल्या एक ते दीड वर्षापासून येथे पाणी दररोज न येता एक दिवस आड सोडले जात होते. मात्र आता त्यामध्ये पुन्हा वाढ करण्यात येऊन आता दोन दिवसांतून एकदा पाणी सोडले जात असून तेही कधीच वेळेवर येत नसल्याने अनेकजण या पाण्यापासून वंचित राहत आहेत. पावसाळा संपत नाही तोच पाण्याची इतकी वाईट परिस्थिती या भागात बनल्याने ग्रामपंचायतीच्या नियोजन कारभारावर अनेक प्रश्न उपस्थित होऊ लागले आहेत.
केडगाव गावठाणात काही भागात अगोदर पाणी सकाळी 9:30 ते 10:00 दरम्यान सोडले जायचे. आता मात्र ते पाणी कधी सकाळी 7:00 वाजता, कधी 6:30 वाजता तर कधी 5:00 वाजता सोडले जात आहे. त्यामुळे अनेक नागरिकांना याचा मोठा फटका बसत असून पाण्याचा हा गोंधळ मात्र महिलांना मानसिक त्रासाचे कारण बनत आहे. पाण्याचा हा सर्व खेळ गावातील सर्वसामान्यांच्या चांगलाच अंगलट येताना दिसत आहे. अजून पावसाळा संपला नाही तोच दोन दिवस आड पाणी सोडले जात असल्याने येथील नागरिक त्रस्त झाले असून यावर त्वरित उपाययोजना केल्या नाही तर भविष्यात याचा फटका सर्वसामान्य जनतेला बसू शकतो यात शंका नाही.
