दौंड : सहकारनामा ऑनलाईन
कोरोना महामारीचा सामना करत असताना संचारबंदीमुळे सर्व उद्योग, धंदे बंद ठेवण्यात आले आहेत त्यामुळे रोजगाराचे साधन उपलब्ध होत नसल्याने गोर गरीब जनता, कष्टकरी, मजूर, हातावर पोट असलेल्या कामगारांचे अन्न धान्यावाचून हाल होऊन त्यांच्यासमोर प्रपंच चालविण्याचा मोठा प्रश्न उभा राहिला होता. शिधापत्रिका धारकांना धान्याचे वाटप होत असले तरीही अनेक कुटुंबे ज्यांना रेशनींग किंवा इतर कुठल्याही प्रकारे अन्न धान्याची मदत मिळत नाही अशा गरजू नागरिकांना मदतीची अत्यंत आवश्यकता होती अशा नागरिकांना दौंडचे आमदार राहुल कुल यांनी त्यांच्या सहकाऱ्यांच्या माध्यमातून मदत पोहचविण्याचा प्रयत्न केला आहे. विविध उद्योग, सेवाभावी संस्था व अनेक दानशूर व्यक्तींच्या मदतीने सध्या दौंड तालुक्यात वास्तव्यास असलेल्या, ज्यांना रेशनींग किंवा इतर कुठल्याही प्रकारे अन्न धान्याच्या मदत मिळालेली नाही अशा आजतागायत सुमारे ६००० हुन अधिक कुटुंबाना कमीत कमी १५ दिवस पुरेल इतकी किराणा सामग्री वाटप करण्यात आली आहे. या किटमध्ये ५ किलो तांदूळ, १ किलो साखर, २०० ग्रॅम चहा पत्ती, १ किलो मीठ, १.५ किलो तूरडाळ, १ मसाला पॅकेट, १ किलो तेल, साबण अशा विविध गोष्टींचा समावेश करण्यात आला आहे. कोरोना विषाणूचा प्रादुर्भाव रोखण्यासाठी तालुक्यातील दौंड उपजिल्हा व यवत ग्रामीण रुग्णालयाचे डॉक्टर, नर्सेस व कर्मचारी, आशा वर्कर, अंगणवाडी सेविका, पोलीस अधिकारी व कर्मचारी, ग्रामसेवक, तलाठी, मंडलाधिकारी, पोलीस पाटील तसेच खाजगी डॉक्टर्स हे सर्व कर्मचारी आपल्या जीवाची कोणतीही पर्वा न करता तालुक्याच्या सेवेसाठी झटत आहेत. या कर्मचाऱ्यांचे मनोबल वाढावे या हेतूने त्यांच्या आरोग्याच्या सुरक्षिततेसाठी आवश्यक वस्तूंचे वाटपहि यापूर्वी आमदार कुल यांच्या माध्यमातून करण्यात आले आहे.
