अब्बास शेख
दौंड : संपूर्ण महाराष्ट्रामध्ये साखर कारखानदारी अडचणीत येण्याच्या घटना नविन नाहीत. महाराष्ट्रातील अनेक साखर कारखाने अडचणीत आले अण कायमचे बंद पडले, पुणे जिल्हा सुद्धा याला अपवाद नाही. पुणे जिल्ह्यातील साखर कारखानदारी अडचणीत आल्यानंतर अनेक सहकारी, खाजगी साखर कारखाने बंद पडले, विकले गेले मात्र याला अपवाद ठरला आहे तो दौंड तालुक्यातील भीमा सहकारी साखर कारखाना. मोठा अनुभव असलेल्या दिग्गज कारखानदारांना आपले कारखाने डोळ्यासमोर बंद पडत असल्याचे दिसत असतानाही हतबलतेशिवाय त्यांच्या हातात काहीच नव्हते त्यामुळे ते कारखाने आजही मदतीच्या प्रतीक्षेत बंद अवस्थेत असल्याचे पहायला मिळते.
पुणे जिल्ह्यातील आर्थिक अडचणी, कर्जबाजारीपणा किंवा जप्तीच्या कारवाईमुळे बंद पडलेले किंवा दीर्घकाळ बंद असलेल्या प्रमुख साखर कारखान्यांमध्ये यशवंत सहकारी साखर कारखाना (थेऊर) राजगड सहकारी साखर कारखाना (भोर) घोडगंगा सहकारी साखर कारखाना (शिरूर) आणि भीमा पाटस सहकारी साखर कारखाना (दौंड) अश्या प्रमुख सहकारी साखर कारखान्यांचा समावेश होता. तर खाजगी कारखान्यांमध्ये असे अनेक कारखाने आहेत की जे आर्थिक अडचणींमुळे बंद पडले किंवा विकले गेले.
यात जर पुणे जिल्ह्यातील सहकारी साखर कारखान्यांची माहिती घेतली तर दौंड तालुक्यातील भीमा पाटस सहकारी साखर कारखाना सोडला तर अन्य बंद पडलेले कारखाने अजूनही सुरु होण्याच्या, भाडे तत्वावर देण्याच्या प्रतीक्षेत आहेत मात्र त्यांना अजूनही हवे तसे यश मिळालेले नाही. सहकारी साखर कारखानदारी अडचणीत आल्यानंतर भीमा पाटस सहकारी कारखानाही त्यातून सुटला नव्हता.
मात्र त्याला या अडचणीतून बाहेर काढण्यासाठी आणि पुन्हा जोमाने तो सुरु करण्यासाठी जर कुणी सर्वोतोपरी प्रयत्न केले असा प्रश्न सभासदांना विचारला जातो त्यावेळी त्याचे एकच उत्तर दिले जाते ते म्हणजे कारखान्याचे मा.चेअरमन आणि दौंडचे विद्यमान आमदार राहुल कुल. ज्यावेळी दिग्गज लोकांच्या हातातील सहकारी साखर कारखाने आर्थिक अडचणीत आले त्यावेळी भीमा पाटस सहकारी साखर कारखानाही अडचणीत आला होता. मात्र कल्पक दृष्टी वापरून त्याला नव संजीवनी देण्याचे काम मा.चेअरमन आणि आमदार राहुल कुल यांनी केल्याने या कारखान्याचे धुराडे आजही सुरु आहे.
बंद पाडण्याचे विविध प्रयत्न होत असल्याचा सभासदांचा आरोप – हा कारखाना म्हणजे दौंड तालुक्याची आणि ऊस उत्पादक शेतकऱ्यांची लाईफलाईन आहे त्यामुळे हा कारखाना बंद पाडण्यासाठी अनेकवेळा प्रयत्न केले गेले आहेत असा आरोप ऊस उत्पादक शेतकरी करताना दिसत असून कारखाना बंद म्हणजे आरोप करायला मोकळीक अण कारखाना सुरु म्हणजे सर्व सुरळीत असा काहीसा प्रकार आहे. त्यामुळे हा कारखाना सुरु म्हणजे काहींना ‘असून अडचण नसून खोळंबा’ झाला असल्याचे सभासदांचे म्हणणे आहे. जिल्ह्यातील दिग्गजांचे कारखाने बंद पडल्यानंतर ते पुन्हा सुरु होतील की नाही याची शास्वती नाही. मात्र आमदार राहुल कुल यांनी ऊस उत्पादक शेतकऱ्यांचा सहकारी कारखाना सुरु ठेवण्यासाठी केलेल्या विविध प्रयत्नांचे आणि त्याला आलेल्या यशाचे आजही कौतुक केले जाते हेही तितकेच खरे आहे.
