केडगाव : दौंड तालुक्यातील केडगाव आणि परिसरामध्ये गेल्या काही काळापासून रात्री अपरात्री १-२ वाजण्याच्या दरम्यान मोठ्या आवाजात वाजवल्या जाणाऱ्या भोंग्यांमुळे येथील नागरिकांची झोप उडाली असून दररोज कुठे ना कुठे जागरण, विविध घरगुती कार्यक्रम असे निमित्त साधून मोठमोठ्या आवाजात भोंगे लावून गाणी वाजवली जात असतात. त्यामुळे सकाळी लवकर उठून कामावर जाणाऱ्या लोकांना, आजारी व्यक्तींना, लहान मुले, वृद्धजणांना आणि शाळेचा अभ्यास करणाऱ्या विद्यार्थ्यांना याचा मोठा मानसिक त्रास सहन करावा लागत आहे. हे भोंगे रात्री १,२ वाजल्यापासून ते पहाटेपर्यंत मोठ्या आवाजात वाजवले जात असल्याने या भोंग्यांवर आता पोलिसांनी योग्य ती कारवाई करावी अशी मागणी सर्वसामान्य लोकांकडून होऊ लागली आहे. त्यातच राऊंडला येणाऱ्या पोलिसांच्या गाडीला हे रात्री १ नंतर वाजत असणारे भोंगे ऐकू येत नसावेत का यावर आश्चर्य व्यक्त केले जात आहे.
दौंड तालुक्यातील केडगावची तालुक्यातील मिनी शहर म्हणून ओळख आहे. या केडगावला नवसंजीवनी मिळाली ती येथील रेल्वेलाईन आणि महामार्गामुळे कारण या दळणवळणाच्या स्रोतांमुळे नोकरदारवर्ग आणि व्यवसायिक लोकांना दररोज पुण्याला जाणे आणि पुन्हा नोकरी, काम धंदा आटोपून वेळेत घरी पोहोचणे सोपे झाले. मात्र आता याच लोकांना गेल्या काही महिन्यांपासून रात्री अपरात्री मोठ्या आवाजात वाजणाऱ्या भोंग्यांमुळे मोठा त्रास होऊ लागला असून याची तक्रार जर पोलिसांना केली तर त्या तक्रारदाराचे नाव दुसऱ्याच दिवशी संबंधित लोकांना माहित होते आणि त्यामुळे रात्री अपरात्री भोंगा लावणारे आणि तक्रार करणाऱ्या व्यक्तींमध्ये कायमचे वैर निर्माण झाल्याची प्रकरणे घडू लागली आहेत.
फोन करुन तक्रार केली अण अडचण निर्माण झाली – मागे काही काळापूर्वी या सर्व प्रकाराचा त्रास होत असलेल्या आणि पुण्याला नोकरीसाठी ये-जा करणाऱ्या एका ग्रामस्थाने गुप्तपणे पोलिसांना फोन करुन मोठ्या आवाजातील वाजणाऱ्या भोंग्यामुळे त्रास होत असल्याची माहिती दिली होती. मात्र त्याच्या दुसऱ्याच दिवशी कुणी फोन केला होता ही माहिती थेट पोलीस ठाण्यातून लिक झाल्याचा संशय असून यामुळे यातील तक्रारदाराला संबंधित लोकांच्या रोषाला सामोरे जावे लागले होते. यामुळे दररोज उठबस होत असलेल्या काही लोकांसोबतच त्याला त्यावेळी नाहक वैर पत्करावे लागले होते अशी माहिती सदर इसमाने नाव न छापण्याच्या अटीवर आपला अनुभव कथन केला आहे.
अश्या प्रकारच्या काही घटना येथे घडलेल्या असल्याने सर्वसामान्य नागरिक त्रास होऊनही तक्रार करायला धजावत नाहीत. त्यामुळे पोलीस ठाण्यातून अशी गुप्त माहिती लिक करणाऱ्या लोकांवर सुद्धा कारवाई होण्याची गरज निर्माण झाली असून रात्रीच्यावेळी राऊंडला येणाऱ्या पोलिसांच्या गाडीला जर असे आवाज कानी पडले तर त्यांनी त्यावर योग्य ती कारवाई करण्याची गरज निर्मण झाली आहे.
