खुटबाव : यवत पोलीस ठाण्याच्या हद्दीतील एकेरीवाडी परिसरात किरकोळ कारणावरून झालेल्या वादातून एका तरुणासह त्याच्या नातेवाईकांना लोखंडी कोयता, रॉड, गज व लाथाबुक्क्यांनी मारहाण करून दमदाटी केल्याची घटना समोर आली आहे. याप्रकरणी नऊ जणांविरोधात यवत पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, विठ्ठल रामचंद्र महारनवर (वय ३३, व्यवसाय शेती, रा. एकेरीवाडी, ता. दौंड, जि. पुणे) यांनी याबाबत फिर्याद दिली आहे. त्यांच्या फिर्यादीनुसार ही घटना एकेरीवाडी येथील फिर्यादीच्या घराजवळ रोडवर घडली.
या प्रकरणात प्रतीक विठ्ठल शेलार, विद्या प्रतिक शेलार, माऊली बाबुराव शेलार, मयूर ज्ञानेश्वर शेलार (सर्व रा.एकेरीवाडी, ता.दौंड) सुरज संजय शेलार (देलवडी) अजय कृष्णा शेळके, प्रथमेश बाळासाहेब जाधव (दोघे रा.केडगाव ता.दौंड) वैभव दिवेकर व बंट्या दिवेकर (रा.वरवंड ता.दौंड) यांच्याविरोधात गुन्हा दाखल करण्यात आला आहे.
फिर्यादीने दिलेल्या तक्रारीनुसार, आरोपींनी लोखंडी कोयता, लोखंडी रॉड व गज हातात घेऊन बेकायदा जमाव जमवून फिर्यादी तसेच त्यांचा लहान भाऊ तुकाराम आणि दाजी आप्पा टकले यांना शिवीगाळ व दमदाटी करत त्यांच्या हातावर, पायावर व पाठीवर लाथाबुक्क्यांनी मारहाण करून जिवे मारण्याची धमकी दिली. या प्रकरणी यवत पोलीस ठाण्यात गुन्हा दाखल करण्यात आला असून पुढील तपास पोह. भापकर हे करीत आहेत.
