दौंड : कॉलेजमधून स्कुटीवरून घरी जात असलेल्या अल्पवयीन मुलीचा रस्ता अडवून तिचा हात पकडून गैरवर्तन करत विनयभंग केल्याचा धक्कादायक प्रकार कांरडे-पिंगळेवस्ती परिसरात घडला. या प्रकरणी यवत पोलिसांनी होमगार्ड असलेल्या एका व्यक्तीस अटक केली असून त्याच्या एका अनोळखी साथीदाराविरुद्धही गुन्हा दाखल करण्यात आला आहे. याप्रकरणी मुलीच्या वडिलांनी यवत पोलीस ठाण्यात फिर्याद दिली आहे. त्यानुसार रमजान रसूल शेख (रा. राहू, ता. दौंड) आणि त्याच्या एका अनोळखी मित्राविरुद्ध गुन्हा दाखल करण्यात आला आहे. आरोपी रमजान शेख हा होमगार्ड असल्याची माहिती पोलिसांनी दिली आहे.
पोलिसांनी दिलेल्या माहितीनुसार, 2 सप्टेंबर रोजी दुपारी साडेबारा वाजण्याच्या सुमारास कांरडे-पिंगळेवस्ती जवळील रस्त्यावर हा प्रकार घडला. अल्पवयीन मुलगी आपल्या मैत्रिणीसोबत स्कुटीवरून कॉलेज सुटल्यानंतर घरी जात असताना आरोपी रमजान शेख व त्याचा मित्र मोटारसायकलवरून तेथे आले. त्यांनी मुलीची स्कुटी अडवली. यावेळी रमजान शेख याने मुलीचा हात पकडून तिला जवळ ओढत गैरवर्तन केले तसेच तिला धमकी दिल्याचे फिर्यादीत नमूद करण्यात आले आहे.
या प्रकारामुळे घाबरलेल्या मुलीने घरी जाऊन आपल्या वडिलांना घटनेची माहिती दिली. आरोपी पूर्वीपासून मुलीचा पाठलाग करत असून तिच्याकडे वाईट नजरेने पाहत असल्याचा तसेच रात्रीच्या वेळी तिच्या घराजवळ येत असल्याचाही आरोप फिर्यादीने केला आहे. या प्रकरणी यवत पोलिसांनी भारतीय न्याय संहिता कलम 74, 126(2), 351(3), 3(5), पोक्सो कायदा कलम 8, 12 तसेच माहिती तंत्रज्ञान अधिनियम कलम 66 अन्वये गुन्हा दाखल केला आहे. आरोपी रमजान रसूल शेख याला पोलिसांनी अटक केली असून या गुन्ह्याचा पुढील तपास पोलीस निरीक्षक संतोष तासगावकर करीत आहेत.
