अब्बास शेख
दौंड : यवत पोलीस ठाण्याच्या हद्दीत अवैधरित्या गावठी पिस्तुलांची विक्री अथवा हस्तांतरण करण्याच्या तयारीत असलेल्या एका आरोपीला पोलिसांनी सापळा रचून ताब्यात घेतले. आरोपीकडून दोन गावठी पिस्तुल, १० जिवंत काडतुसे आणि दोन रिकामे मॅगझिन, असा एकूण सुमारे ५५ हजार रुपयांचा मुद्देमाल जप्त करण्यात आला. ही कारवाई ३१ ऑगस्ट २०२६ रोजी सायंकाळी सुमारे ६ वाजता यवत पोलीस ठाण्याच्या हद्दीत दौंड तालुक्यातील मंगलमूर्ती मिसळ हॉटेलच्या बाजूला करण्यात आली.
यवत पोलीस ठाण्यातील पोलीस कॉन्स्टेबल धिरज जाधव यांना मिळालेल्या गोपनीय माहितीनुसार, एक इसम गावठी पिस्तुल बाळगून असल्याची माहिती मिळाली होती. या माहितीची खातरजमा करून पोलिसांनी घटनास्थळी सापळा रचला आणि समीर जावेद सय्यद (वय २६, रा. सहकारनगर, टिळेकरवाडी, ता. हवेली, जि. पुणे) याला ताब्यात घेतले. त्याची झडती घेतली असता त्याच्याकडे दोन गावठी पिस्तुल मॅगझिनसह, १० पिवळ्या धातूची जिवंत काडतुसे आणि दोन रिकामे मॅगझिन आढळून आले. जप्त करण्यात आलेल्या मुद्देमालाची एकूण किंमत सुमारे ५५ हजार रुपये आहे.
या प्रकरणी पोलीस कॉन्स्टेबल धिरज जाधव यांच्या फिर्यादीवरून आरोपी समीर जावेद सय्यद याच्याविरुद्ध भारतीय शस्त्र अधिनियम १९५९ चे कलम ३, ७, २५ अन्वये यवत पोलीस ठाण्यात गुन्हा दाखल करण्यात आला आहे. पुढील तपास पोलीस उपनिरीक्षक मारोती मेतलवाड करीत आहेत.
तपासादरम्यान आरोपीविरुद्ध यापूर्वी तीन गंभीर गुन्हे दाखल असल्याचे निष्पन्न झाले आहे. यातील दोन गुन्हे यवत पोलीस ठाण्यात, तर एक गुन्हा लोणी काळभोर पोलीस ठाण्यात दाखल आहे. त्यापैकी दोन गुन्हे पुणे शहर पोलीस आयुक्तालयाकडे मोक्का कायद्यांतर्गत दाखल असून आरोपी जामिनावर असल्याचे नमूद करण्यात आले आहे.
सदरची कारवाई पुणे ग्रामीणचे पोलीस अधीक्षक संदीपसिंग गिल, अपर पोलीस अधीक्षक गणेश बिरादार, दौंड विभागाचे उपविभागीय पोलीस अधिकारी बापूराव दळस यांच्या मार्गदर्शनाखाली यवत पोलीस ठाण्याचे पोलीस निरीक्षक संतोष तासगावकर, पोलीस उपनिरीक्षक मारोती मेतलवाड, पोलीस हवालदार रॉकी देवकाते, पोलीस हवालदार संदीप देवकर, पोलीस कॉन्स्टेबल धिरज जाधव, पोलीस कॉन्स्टेबल अमोल भुजबळ, पोलीस कॉन्स्टेबल प्रतीक जगताप, पोलीस कॉन्स्टेबल सचिन गुंड, पोलीस कॉन्स्टेबल दिनेश लोणकर आणि पोलीस कॉन्स्टेबल विनीत कुर्हाडे यांच्या पथकाने केली.
यवत पोलीस ठाण्याच्या हद्दीत अवैध शस्त्रे बाळगणाऱ्यांची माहिती नागरिकांना मिळाल्यास ती तातडीने पोलिसांना द्यावी, असे आवाहन यवत पोलिसांनी केले आहे.
