दौंड : रक्षाबंधन सणानिमित्त नातेवाईकांकडे आलेल्या तरुणांचा गट भीमा नदीत अंघोळीसाठी व मासेमारीसाठी गेला असताना नदीच्या प्रवाहात वाहून गेलेल्या १८ वर्षीय तरुणाचा मृतदेह तब्बल तीन दिवसांनी आढळून आला. ही घटना दौंड तालुक्यातील भीमा नदीपात्रात घडली आहे. रामकुमार फुलसिंग यादव (वय १८, रा. सारोळा रेल्वे स्टेशनजवळ, ता. अहिल्यानगर, जि. अहिल्यानगर) असे मृत तरुणाचे नाव आहे. तो मूळचा मध्य प्रदेशातील रहिवासी असल्याची माहिती पोलिसांनी दिली.
पोलिसांनी दिलेल्या माहितीनुसार, दि. २८ ऑगस्ट रोजी सायंकाळी जेठूसिंग कुवरसिंग दुर्वे व त्यांचे १२ मित्र असे एकूण १३ जण रक्षाबंधन सणानिमित्त दौंड येथे आले होते. दुसऱ्या दिवशी, दि. २९ ऑगस्ट रोजी सकाळी ११ वाजण्याच्या सुमारास सर्वजण पानसरे वस्ती परिसरातील भीमा नदीकाठी अंघोळीसाठी व मासेमारीसाठी गेले होते.
यावेळी रामकुमार यादव, रामा पतिराम दुर्वे (१७), कमलेश बुधसिंग पट्टा (१९) आणि विजय गोविंद दुर्वे (२५) हे चौघे नदीच्या मध्यभागी असलेल्या खडकावर गेले होते. तेथे गळाने मासे पकडत असताना रामकुमार याने अचानक खडकावरून नदीत उडी मारली. मात्र नदीच्या पाण्याचा प्रवाह वेगवान असल्याने तो प्रवाहासोबत वाहून जाऊ लागला.
रामकुमारला वाचवण्यासाठी विजय, कमलेश आणि रामा यांनीही नदीत उड्या घेतल्या. मात्र पाण्याचा प्रवाह अधिक असल्याने तेही वाहून जाऊ लागले. त्यांनी आरडाओरडा केल्यानंतर नदीकाठी मासेमारी करणाऱ्या एका व्यक्तीने त्यांना पाण्यातून बाहेर काढले. मात्र रामकुमार प्रवाहासोबत पुढे वाहून गेला. यानंतर नातेवाईक, पोलीस आणि मच्छीमारांच्या मदतीने नदीपात्र तसेच नदीकिनारी त्याचा शोध घेण्यात आला. डायल ११२ वर फोन करून पोलिसांना घटनेची माहिती देण्यात आली होती. रेस्क्यू टीमकडूनही सलग शोधमोहीम राबविण्यात आली; मात्र रामकुमारचा ठावठिकाणा लागत नव्हता.
अखेर दि. ३१ ऑगस्ट २०२६ रोजी सकाळी ११ वाजण्याच्या सुमारास नवीन ब्रिजजवळील महादेव मंदिरासमोर, भीमा नदीपात्रात रामकुमारचा मृतदेह आढळून आला. त्याचा मृतदेह दुपारी ३.३२ वाजता पोलिसांकडे दाखल करण्यात आला. सलग तीन दिवस सुरू असलेल्या शोधमोहीमेनंतर तरुणाचा मृतदेह सापडल्याने कुटुंबीयांवर दुःखाचा डोंगर कोसळला आहे. पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस शिपाई लवटे करीत आहेत.
