उरुळीकांचन : उरुळीकांचन-डाळिंब रोडवरील सदानंद बेकरीजवळ गावठी पिस्टल घेऊन फिरणाऱ्या रेकॉर्डवरील गुन्हेगाराला पुणे ग्रामीण दहशतवाद विरोधी पथक (एटीएस) ने ताब्यात घेतले. त्याच्याकडून एक गावठी बनावटीचे पिस्टल, दोन जिवंत काडतुसे आणि दोन कोयते असा एकूण ५१ हजार २०० रुपयांचा शस्त्रसाठा जप्त करण्यात आला आहे. ही कारवाई २७ ऑगस्ट २०२६ रोजी करण्यात आली. भाऊसो उर्फ भावड्या भगवान महाडिक (वय ३४, सध्या रा. डाळिंब रोड, खुडे वस्ती, ता. दौंड, जि. पुणे; मूळ रा. शिंदवणे, ता. हवेली) असे ताब्यात घेतलेल्या आरोपीचे नाव असून याबाबतची माहिती पुणे ग्रामीण (ए.टी.एस.) दहशतवाद विरोधी पथकाचे सहाय्यक पोलीस निरीक्षक दत्ताजीराव मोहिते यांनी दिली आहे.
पुणे ग्रामीण दहशतवाद विरोधी पथक उरुळीकांचन पोलीस ठाणे परिसरात गोपनीय माहिती घेत असताना सहाय्यक पोलीस उपनिरीक्षक निलेश कदम व महेश गायकवाड यांना बातमीदारामार्फत माहिती मिळाली की, उरुळीकांचन-डाळिंब रोडवरील सदानंद बेकरीजवळ एक व्यक्ती गावठी पिस्टल घेऊन थांबली आहे. माहितीची खात्री करून एटीएस पथकाने तातडीने घटनास्थळी धाव घेतली. यावेळी भाऊसो उर्फ भावड्या महाडिक हा पळून जाण्याच्या तयारीत असताना पथकाने त्याला ताब्यात घेतले. त्याची झडती घेतली असता एक गावठी पिस्टल, दोन जिवंत काडतुसे आणि दोन कोयते असा शस्त्रसाठा आढळून आला.
यापूर्वीही गंभीर गुन्हा दाखल
भाऊसो महाडिक हा रेकॉर्डवरील गुन्हेगार असल्याची माहिती पोलिसांनी दिली असून यापूर्वी आयटीआय, बोरी भडक परिसरात पाच साथीदारांसह जमाव जमवून मारहाण करून गंभीर दुखापत केल्याप्रकरणी त्याच्याविरुद्ध यवत पोलीस ठाण्यात गुन्हा दाखल आहे. सदर प्रकरण दौंड न्यायालयात सुरू आहे.
या गुन्ह्यातील त्याचा साथीदार शुभम उर्फ लल्या लोंढे याच्याविरुद्ध यापूर्वी उरुळीकांचन येथील महाविद्यालयीन विद्यार्थ्याच्या खूनप्रकरणी गुन्हा दाखल असल्याचेही पोलिसांनी सांगितले. दरम्यान, महाडिक याने ही हत्यारे नेमकी कशासाठी आणली होती, याचा तपास सुरू असून उरुळीकांचन पोलीस ठाण्याचे पोलीस उपनिरीक्षक तारडे अधिक तपास करीत आहेत.
पथकाची उल्लेखनीय कामगिरी
ही कारवाई पुणे ग्रामीणचे पोलीस अधीक्षक संदीप सिंह गिल्ल, बारामती विभागाचे अपर पोलीस अधीक्षक गणेश बिरादार, दौंड विभागाचे एसडीपीओ बापूराव दडस आणि उरुळी कांचन पोलीस ठाण्याच्या वरिष्ठ पोलीस निरीक्षक विजयमाला पवार यांच्या मार्गदर्शनाखाली करण्यात आली. दहशतवाद विरोधी शाखेचे सहाय्यक पोलीस निरीक्षक दत्ताजीराव मोहिते, सहाय्यक पोलीस उपनिरीक्षक महेश गायकवाड, निलेश कदम तसेच पोलीस अंमलदार रवींद्र जाधव, मोसीन शेख, ओंकार शिंदे आणि जालिंदर मुळीक यांच्या पथकाने ही कारवाई केली.
बेकायदा शस्त्रे बाळगणारे, अंमली पदार्थांची विक्री करणारे तसेच समाजात दहशत व गुन्हेगारी निर्माण करणाऱ्या प्रवृत्तींविरुद्ध दहशतवाद विरोधी शाखेकडून यापुढेही प्रभावी कारवाईची मोहीम सुरू ठेवण्यात येणार असल्याचे पोलीस अधीक्षक संदीप सिंह गिल्ल यांनी दिली.
