उरुळी कांचन : हडपसर पोलीस ठाणे गुन्हा क्रमांक ३७९/२०२६ तसेच दापोडी पोलीस ठाणे गुन्हा क्रमांक ११४/२०२६ अंतर्गत भारतीय न्याय संहितेतील कलम १०५, १२३ व १२५ अन्वये दाखल गुन्ह्यातील वॉन्टेड आरोपी दत्ता उर्फ भावड्या भिमराव लोंढे (रा. पांढरस्थळ, उरुळी कांचन) याला पोलिसांच्या पथकाने ताब्यात घेतले आहे. सदर गुन्ह्यामध्ये विषारी दारु सेवनाने २२ लोकांचा मृत्यू झाला होता. तेव्हापासून हा आरोपी फरार होता. मात्र आरोपी दत्ता उर्फ भाऊड्या लोंढे हा शिंदवणे व शिंदवणे घाट परिसरात वेशांतर करून, रूप बदलून फिरत असल्याची गोपनीय माहिती पोलिसांना मिळाल्यानंतर त्याला पकडण्यात आले आहे.
पुणे ग्रामीणचे पोलीस अधीक्षक संदीप सिंग गिल, पोलीस अधीक्षक शफकत अमना (सीआयडी पुणे घटक) अप्पर पोलीस अधीक्षक गणेश बिरादार तसेच दौंड विभागाचे उपविभागीय पोलीस अधिकारी बापूराव दडस यांच्या मार्गदर्शनाखाली उरुळी कांचन पोलीस ठाण्याच्या वरिष्ठ पोलीस निरीक्षक विजयमाला पवार, सहायक पोलीस निरीक्षक पांडुरंग पवार, पोलीस उपनिरीक्षक अर्जुनाथ शिंदे, सहा. फौजदार रमेश भोसले, पोलीस हवालदार सोमनाथ चितारे, सचिन जगताप, कमलेश होळे, तसेच पोलीस शिपाई अक्षय कामठे, ऋषिकेश रासकर, संजय दापणे आणि सोमनाथ सुपेकर यांच्या पथकाने ही कारवाई केली.
पोलिसांना आरोपी राजेवाडी, ता. पुरंदर, जि. पुणे येथे वेशांतर करून तसेच वाहनाची नंबरप्लेट बदलून त्या ठिकाणाहून पळून जाण्याच्या तयारीत असल्याची माहिती मिळाली. त्यानुसार पोलिसांनी सापळा रचून आरोपीला शिताफीने ताब्यात घेतले. त्यानंतर आरोपीची ओळख पटवून त्याला उरुळी कांचन पोलीस ठाण्यात आणण्यात आले. सदरची कारवाई उरुळी कांचन पोलीस ठाणे व सीआयडी पुणे यांनी संयुक्तरीत्या केली आहे. ताब्यात घेतलेल्या आरोपीला पुढील तपासासाठी सीआयडी पुणे पथकाचे प्रमुख डी. वाय. एस. पी. शामराव काळे यांच्या पथकाकडे सोपविण्यात आले आहे.
