पुणे : चाकण-तळेगाव औद्योगिक क्षेत्रातील उद्योजकांच्या अडचणी दूर करण्यासाठी तसेच उद्योगांचे स्थलांतर रोखण्यासाठी शासनाकडून तातडीच्या आणि दीर्घकालीन उपाययोजना करण्यात येत आहेत. परिसरातील वाहतूक कोंडी, रस्ते, ड्रेनेज, पाणीपुरवठा, वीज आणि अन्य पायाभूत सुविधांच्या प्रश्नांवर एकात्मिक पद्धतीने काम केले जाणार असल्याची ग्वाही उपमुख्यमंत्री तथा नगरविकास मंत्री एकनाथ शिंदे यांनी दिली.
उपमुख्यमंत्री शिंदे यांनी चाकण व तळेगाव औद्योगिक परिसराला भेट देऊन रस्ते दुरुस्तीच्या कामांची पाहणी केली. त्यानंतर उद्योजक आणि औद्योगिक संघटनांच्या प्रतिनिधींसोबत बैठक घेऊन विविध समस्यांवर चर्चा केली. यावेळी उद्योगमंत्री उदय सामंत, विधान परिषद सदस्य डॉ. नीलम गोऱ्हे, आमदार शरद सोनवणे, आमदार बाबाजी काळे, जिल्हाधिकारी जितेंद्र डुडी, पोलीस आयुक्त विनयकुमार चौबे यांच्यासह विविध विभागांचे वरिष्ठ अधिकारी व उद्योजक उपस्थित होते.
खड्डे बुजवण्यासाठी आधुनिक तंत्रज्ञानाचा वापर
चाकण औद्योगिक क्षेत्रातील वाहतूक कोंडी होणाऱ्या ठिकाणांची प्रत्यक्ष पाहणी करताना शिंदे यांनी एम-६० हार्डनरचा वापर करून खड्डे बुजवण्याच्या कामाची माहिती घेतली. पावसामुळे खराब झालेल्या रस्त्यांवर थेट कास्टिंग करून पॅचेस बसवण्याचे कामही सुरू आहे. या तंत्रज्ञानामुळे कमी वेळेत रस्ता दुरुस्त करून त्यावरून अवजड वाहतूक सुरू करणे शक्य होणार आहे. चाकण-शिक्रापूर मार्गावरील मोठ्या प्रमाणातील खड्ड्यांमुळे औद्योगिक वाहतुकीवर परिणाम होत आहे. पावसाळ्यात पारंपरिक डांबरीकरण टिकत नसल्याने जिओ पॉलिमर टेक्नो पॅच आणि एम-६ आरएमसी विथ हार्डनरचा वापर केला जात आहे. जिओ पॉलिमर मिश्रण अर्धा ते पाऊण तासात सेट होत असल्याने दुरुस्तीनंतर वाहतूक लवकर सुरू करता येणार आहे. अत्यंत खराब ठिकाणी प्री-कास्ट पॅनेल बसविण्याचे कामही केले जात आहे.
तळेगाव-शिक्रापूर ५४ किमी मार्गाला गती
औद्योगिक क्षेत्रातील प्रश्न कायमस्वरूपी सोडवण्यासाठी जिल्हाधिकाऱ्यांच्या अध्यक्षतेखाली विशेष नोडल समिती स्थापन करण्यात आली आहे. ही समिती दर शुक्रवारी बैठक घेऊन रस्ते, ड्रेनेज, फुटपाथ, स्ट्रीट लाईट्स आणि इतर पायाभूत सुविधांच्या प्रश्नांचा आढावा घेणार आहे. तळेगाव ते शिक्रापूर या ५४ किलोमीटर मार्गाची दुरुस्ती, नाशिक फाटा ते राजगुरुनगर रस्ता तसेच औद्योगिक क्षेत्रातील अंतर्गत रस्त्यांच्या कामांना गती देण्यात येणार आहे. नवीन रस्ते तयार करताना फुटपाथ, युटिलिटी सुविधा आणि सायकल ट्रॅकचा समावेश करण्याचे निर्देश देण्यात आले आहेत.
निगडी-चाकण मेट्रोचा आराखडा
औद्योगिक क्षेत्रात काम करणाऱ्या हजारो कामगारांचा प्रवासाचा वेळ कमी करण्यासाठी क्लस्टरच्या माध्यमातून कामगार वसाहती उभारण्याबाबत सकारात्मक निर्णय घेतला जाणार आहे. तसेच निगडी-चाकण, चाकण-राजगुरुनगर आणि तळेगाव-शिक्रापूर या प्रस्तावित मेट्रो मार्गांचा विकास आराखडा तयार करण्याचे निर्देश महामेट्रोला देण्यात आले आहेत.
उद्योजकांच्या समस्या सोडवण्यासाठी अधिकारी थेट उपलब्ध
उद्योजकांच्या समस्या तातडीने सोडवण्यासाठी एमआयडीसीचे कार्यकारी अभियंते आणि अन्य अधिकारी आठवड्यातून एक दिवस औद्योगिक क्षेत्रात प्रत्यक्ष उपलब्ध राहणार आहेत. उद्योजकांनी आपल्या समस्या शासनापर्यंत पोहोचवण्यासाठी ‘मैत्री’ ॲपचा अधिकाधिक वापर करावा, असे आवाहनही करण्यात आले.
शासनाच्या या उपाययोजनांमुळे चाकण-तळेगाव औद्योगिक क्षेत्रातील पायाभूत सुविधांना चालना मिळून वाहतूक कोंडीचा प्रश्न कमी होण्यास मदत होणार आहे. उद्योगांना आवश्यक सुविधा उपलब्ध करून देत या परिसराचा सर्वांगीण विकास करण्याचा शासनाचा प्रयत्न असल्याचे उपमुख्यमंत्री एकनाथ शिंदे यांनी स्पष्ट केले.
