जुन्नर : पुणे जिल्ह्यातील जुन्नर तालुक्यातील पिंपळवंडी येथे अल्पवयीन चिमुकलीवर लैंगिक अत्याचार करून तिची हत्या केल्याची संतापजनक घटना समोर आली आहे. या प्रकरणी पोलिसांनी पिंपळवंडी गावातीलच साहिल खैरे या २५ वर्षीय तरुणाला ताब्यात घेतले आहे. धक्कादायक बाब म्हणजे मुलीचा शोध सुरू असताना संशयित स्वतः पोलिसांसोबत शोधकार्यात सहभागी झाल्याचे समोर आले. मात्र, त्याच्या संशयास्पद हालचालींमुळे पोलिसांना त्याच्यावर संशय आला.
मिळालेल्या माहितीनुसार, चौथीत शिकणारी चिमुकली आजारी असल्याने मंगळवारी शाळेत गेली नव्हती. दुपारच्या सुमारास तिचे पालक घराबाहेर गेले असताना ती घरी एकटी होती. याच संधीचा गैरफायदा घेत शेजारी राहणाऱ्या तरुणाने तिला घराबाहेर बोलावून सायकलवरून गावाबाहेरील उसाच्या शेतात नेले आणि तेथे तिच्यावर अत्याचार करून तिची हत्या केली.
मुलीचे वडील घरी परतल्यानंतर मुलगी घरात नसल्याचे त्यांच्या निदर्शनास आले. त्यांनी परिसरात शोध घेतला; मात्र मुलगी सापडली नाही. त्यानंतर आळेफाटा पोलिसांकडे मुलगी बेपत्ता असल्याची तक्रार दाखल करण्यात आली. पोलिसांनी तत्काळ तपास सुरू करून गावात शोधमोहीम राबवली. मुलीचा शोध सुरू असताना संशयित तरुणही पोलिसांना मदत करण्याच्या बहाण्याने शोधकार्यात सहभागी झाला. मात्र त्याच्या हालचाली पोलिसांना संशयास्पद वाटल्या. त्यानंतर पोलिसांनी त्याला ताब्यात घेऊन चौकशी केली. चौकशीत त्याने गुन्ह्याची कबुली दिली. त्याने दाखवलेल्या ठिकाणी ‘लेंडे स्थळ’ परिसरातील एका ओढ्याजवळ झाडाशेजारी चिमुकलीचा मृतदेह आढळून आला.
घटनेची माहिती मिळताच पुणे ग्रामीणचे पोलीस अधीक्षक संदीप गिल, उपविभागीय पोलीस अधिकारी धनंजय पाटील आणि पोलीस निरीक्षक विश्वास जाधव यांनी घटनास्थळी भेट देऊन घटनेचा आढावा घेतला. फॉरेन्सिक पथकाने घटनास्थळाची पाहणी करून आवश्यक पुरावे संकलित केले असून, मृतदेह शवविच्छेदनासाठी पाठवण्यात आला आहे.
उपमुख्यमंत्री सुनेत्रा पवार यांच्याकडून आरोपीवर कठोर कारवाईचे निर्देश
या घटनेने पिंपळवंडी परिसरात संतापाची लाट उसळली आहे. आरोपीवर कठोरात कठोर कारवाई करावी आणि पीडित कुटुंबाला तातडीने न्याय मिळावा, अशी मागणी ग्रामस्थांकडून करण्यात येत आहे. दरम्यान, पुण्याच्या पालकमंत्री तथा उपमुख्यमंत्री सुनेत्रा पवार यांनी पुणे जिल्ह्याचे पोलीस अधीक्षक संदीप गिल यांच्याशी दूरध्वनीवरून संपर्क साधून तपासाचा आढावा घेतला. प्रकरणाची सखोल आणि पारदर्शक चौकशी करून आरोपीवर कठोर कारवाई करण्याचे निर्देश देण्यात आल्याचे त्यांनी सांगितले. तसेच आरोपीला लवकरात लवकर कठोर शिक्षा मिळावी यासाठी हा खटला जलदगती न्यायालयात चालविण्याची विनंती मुख्यमंत्री देवेंद्र फडणवीस यांच्याकडे करणार असल्याचेही त्यांनी स्पष्ट केले.
