पुणे : दूध भेसळीचा प्रश्न विधानसभेत आग्रहाने मांडणारे आमदार राहुल कुल यांच्या सातत्यपूर्ण पाठपुराव्यानंतर राज्यातील सर्वात मोठ्या दूध भेसळ रॅकेटपैकी एक असणाऱ्या टोळीला उद्ध्वस्त करण्यात प्रशासनाला यश आले आहे. पुणे ग्रामीण पोलिस व अन्न-औषध प्रशासनाच्या संयुक्त कारवाईत १३ जणांना अटक करण्यात आली असून, सुमारे अडीच ते तीन कोटी रुपयांचा मुद्देमाल जप्त करण्यात आला आहे.
आमदार कुल यांनी विधानसभेत प्रश्नोत्तराच्या तासात बहुतांश दूध संकलन केंद्रांवर तपासणी सुविधांचा अभाव असल्याचा मुद्दा मांडत, दुधाच्या दर्जावर कडक नियंत्रणाची मागणी केली होती. या पाठपुराव्यानंतर राज्य सरकारने भेसळविरोधी विशेष मोहीम जाहीर केली आणि अवघ्या काही दिवसांत ही धडक कारवाई झाली. पुणे ग्रामीणचे पोलिस अधीक्षक संदीप सिंह गिल आणि अन्न-औषध प्रशासनाचे आयुक्त तुकाराम मुंढे यांच्या मार्गदर्शनाखाली मंचर, सिल्लोड, अकलूज, अहिल्यानगर व सांगली परिसरात ही कारवाई झाली. मंचर हे रॅकेटचे मुख्य केंद्र असल्याचे तपासात समोर आले असून, गेल्या दोन वर्षांपासून हा प्रकार सुरू होता.
हजार लिटर दुधात ५०० लिटर रसायने-शॅम्पू; आमदार राहुल कुल यांच्या पाठपुराव्यानंतर भेसळखोरांना दणका
एक हजार लिटर दुधामध्ये तब्बल ५०० लिटर रासायनिक पाणी व शॅम्पूसदृश पदार्थ मिसळून कृत्रिम दूध तयार केले जात असल्याची धक्कादायक बाब पुणे ग्रामीण पोलिस व अन्न-औषध प्रशासनाच्या संयुक्त कारवाईत उघड झाली आहे. दूध भेसळीचा मुद्दा विधानसभेत लावून धरणारे आमदार राहुल कुल यांच्या पाठपुराव्यातून सुरू झालेल्या विशेष मोहिमेचाच हा भाग मानला जात आहे.
प्राथमिक तपासानुसार ५०० लिटर शुद्ध दुधात सुमारे ३०० लिटर, तर १,००० लिटर दुधात ५०० लिटर रासायनिक पाणी मिसळले जात होते. दुधाचे प्रमाण व घट्टपणा वाढवण्यासाठी वास न येणारा शॅम्पू, दूध पावडर व घातक रसायनांचे मिश्रण दुधात ओतले जात होते. हे भेसळयुक्त दूध नामांकित दुग्धव्यवसाय कंपन्यांना पुरवले जात असल्याचा संशय असून, त्यापासून तयार होणारे दुग्धजन्य पदार्थ लहान मुलांपर्यंतही पोहोचत होते. गोपनीय माहितीच्या आधारे सुमारे ३६ तास चाललेल्या या मोहिमेत राज्यातील तब्बल २३ ठिकाणच्या दूध डेअऱ्यांवर छापे टाकण्यात आले. १३ संशयितांना ताब्यात घेण्यात आले असून दूध, खवा यांचे नमुने व साहित्य जप्त करण्यात आले आहे.
