दौंड : दौंड तालुक्यातील बोरीभडक येथून एका २३ वर्षीय मुलीचे अपहरण करण्यात आले असल्याची फिर्याद मुलीच्या कुटुंबियांनी दिली असून त्यानुसार आरोपी इसम आणि त्याच्या इतर सहकाऱ्यांवर यवत पोलिस ठाण्यात गुन्हा दाखल करण्यात आलेला आहे.
यवत पोलिसांनी दिलेल्या माहितीनुसार सदर २३ वर्षीय मुलीच्या कुटुंबियांनी अशी फिर्याद दिली की, आरोपी कमरुद्दीन मुकीम शेख, (रा. क्र. 75, लेन नं. 10 ए, सय्यद नगर, हडपसर, पुणे) याने दि. २ जून रोजी सकाळी १०:३० वाजता त्याच्या दोन साथीदारांसह फिर्यादी यांच्या राहत्या घरी येऊन फिर्यादी यांच्या मुलीला तिच्या इच्छेविरुद्ध जबरदस्तीने ओढत नेले. यावेळी फिर्यादी व त्यांच्या कुटुंबीयांनी आरोपीस अडविण्याचा प्रयत्न केला असता आरोपीने पिस्तुलाचा धाक दाखवून गोळ्या घालून ठार मारण्याची धमकी दिली असे फिर्यादित नमूद करण्यात आले आहे.
यावेळी प्रतिकार करणाऱ्या फिर्यादीच्या वडिलांना ढकलून मारहाण करण्यात आली व फिर्यादीच्या पत्नीला लाथ मारून शिवीगाळ केली गेली. त्यानंतर आरोपीने या मुलीला हिला जबरदस्तीने चारचाकी वाहनात बसवून पळवून नेले व जाताना घरातील रोख रक्कम ५ लाख १ हजार ५०० रुपये व 7 तोळे वजनाचे सोन्याचे गंठण चोरून नेले असे फिर्यादित म्हटले आहे. घटनेचा अधिक तपास पोलिस निरीक्षक संतोष तासगावकर यांच्या मार्गदर्शनाखाली पोलिस उपनिरीक्षक अक्षय मोरे करीत आहेत.
