अब्बास शेख
दौंड : दौंड तालुक्यातील केडगाव परिसरात गर्भलिंग निदान करणाऱ्या अण्णासाहेब गिरी आणि त्याचा डॉक्टर साथीदार अतुल जाधव याला पुन्हा दोन दिवसांची पोलिस कोठडी सुनावण्यात आली आहे.
गर्भलिंग निदान प्रकरणातील प्रमुख आरोपी अण्णासाहेब गिरी याच्यावर यवत पोलिसांनी कारवाई करताच यातील त्याचे आणखी साथीदार यवत पोलिसांच्या रडारवर आले होते. पोलिस कोठडीत गिरी याच्याकडून या टोळीतील आणखी दोन डॉक्टर आणि गर्भलिंग निदानची मशिन पुरवणाऱ्या व्यक्तीची माहिती मिळवण्यात यवत पोलिसांना यश आले असून या प्रकरणातील एकूण आरोपिंची संख्या आता पाच झाली आहे.
या प्रकरणातील तपास अधिकारी पोलिस उपनिरीक्षक मारोती मेतलवाड यांनी आमच्या प्रतिनिधिंना दिलेल्या माहितीनुसार, गर्भलिंग निदान करण्यासाठी गिरी हा जे मशिन वापरत होता ते मशिन त्याला नरेंद्र ठाकरे या आरोपीने दिले होते तो सध्या जेलमध्ये असून डॉ. मंदार माळी (किकवी, ता.भोर) आणि सुंदरम कदम (उरुळी कांचन, ता.हवेली) या दोन डॉक्टरांची नावे या प्रकरणात आली असून हे दोघेही सध्या फरार आहेत.
यवत पोलिस निरीक्षक नारायण देशमुख यांनी वरिष्ठांच्या आदेशाने पोलिस उपनिरीक्षक मारोती मेतलवाड यांना मार्गदर्शन करत यातील प्रमुख आरोपिंची पाळेमुळे खांदण्यास सुरुवात केली असून या प्रकरणात अजून किती बडे मासे गळाला लागतात याकडे संपूर्ण तालुक्याचे लक्ष लागून राहिले आहे. ही साखळी अजून बरीच मोठी असण्याची शक्यता वर्तवली जात असून यवत पोलिस विविध मार्गाने या टोळीचा तपास करीत आहेत. या प्रकरणी कुणाला गुप्त माहिती प्राप्त असेल तर ती यवत पोलिसांना देण्यात यावी माहिती देणाऱ्याचे नाव गुप्त ठेवले जाईल असे आवाहनही करण्यात आले आहे.
