लोणी काळभोर : लोणी काळभोर येथील अपर तहसील कार्यालयात कामकाज पाहणाऱ्या ग्राम महसूल अधिकारी (तलाठी) ला सुमारे एक लाख रुपयांची लाच मागितल्या प्रकरणी लाचलूचपत विभागाने त्याच्यावर गुन्हा दाखल केला आहे.
मिळालेल्या माहितीनुसार यातील तक्रारदार यांचा जमीन खरेदी-विक्रीचा व्यवसाय असून त्यांनी हिंगणगाव (ता.हवेली) येथील शेतजमीन सपाटीकरण, विहीर खोदकाम व पाईपलाईनची परवानगी मिळावी याकरीता अपर तहसीलदार लोणी काळभोर यांच्याकडे अर्ज केला होता. लोकसेवक अक्षय कोल्हे हा अपर तहसीलदार कार्यालयामध्ये ग्राम महसूल अधिकारी म्हणून काम करत असून त्याने तक्रारदाराकडे वरील कामाची परवानगी देण्यासाठी दोन लाख रुपयांच्या लाचेची मागणी केली होती.
यानंतर तक्रारदार यांनी सदर तलाठ्या विरोधात लाचलूचपत विभागाकडे तक्रार दाखल केली होती. त्यांच्या या तक्रारीच्या अनुषंगाने लाप्रवि विभागाचे पोलिस निरीक्षक सुहास हट्टेकर यांनी त्यांच्या टीमसह लाच मागणी पडताळणी कारवाई केली असता यातील लोकसेवक कोल्हे यांनी पडताळणी कारवाई दरम्यान तक्रारदाराकडे परवानगी अर्जावर अपर तहसीलदार लोणी काळभोर यांच्याकडून कार्यवाही करून देतो या कारणासाठी तडजोडी अंती एक लाख रुपये लाच मागितल्याचे निष्पन्न झाले.
त्यामुळे यातील आरोपी लोकसेवक अक्षय कोल्हे याच्याविरुद्ध लोणीकाळभोर पोलीस स्टेशन येथे भ्रष्टाचार प्रतिबंधक अधिनियम 1988 चे कलम 7 नुसार दि. 29/05/2026 रोजी गुन्हा दाखल करण्यात आला असून पुढील तपास लाप्रवी विभागाच्या पोलिस निरीक्षक श्रीमती आसावरी शेडगे या करीत आहेत.
