अब्बास शेख
केडगाव : दौंड तालुक्यातील केडगाव येथे गाजलेल्या गर्भलिंग निदान प्रकरणाची व्याप्ती आता वाढू लागली आहे. यवत पोलिसांनी यातील पाळेमुळे खांदायला सुरुवात केली असून आता यातील एक एक आरोपी पोलिसांच्या हाती येऊ लागले आहेत.
गर्भलिंग निदान संबंधित रॅकेटची आता पोलखोल होऊ लागली असून या प्रकरणात आरोपी अण्णासाहेब गिरी नंतर आता वाघोली येथील डॉक्टर अतुल अंकुश जाधव यालाही अटक करण्यात आली असून त्याला आज दौंड न्यायालयासमोर हजर केले असता त्यास पाच दिवसांची पोलिस कोठडी सुनावण्यात आली आहे.
यवतचे पोलिस निरीक्षक नारायण देशमुख यांच्या मार्गदर्शनाखाली पोलिस उपनिरीक्षक मारुती मेतलवाड यांनी या प्रकरणाचा तपास सुरु केल्यानंतर अनेक धक्कादायक बाबी उघड होऊ लागल्या आहेत. हे खूप मोठे रॅकेट असून आता एक एकजण पोलिसांच्या रडारवर येऊ लागला आहे.
गर्भलिंग निदान चाचणी प्रकरणात यवत पोलिसांनी मागील आठवड्यात आरोपी अण्णासाहेब गिरी याला पकडून दौंड न्यायालयासमोर हजर केल्यानंतर त्यास पाच दिवसांची पोलिस कोठडी सुनावन्यात आली होती. आज त्याची मुदत संपल्यानंतर त्यास न्यायालयासमोर हजर केल्यानंतर पोलिसांच्या मागणीनुसार पुन्हा गिरी याला पाच दिवसांची पोलीस कोठडी सुनावण्यात आली आहे.
आता गर्भलिंग प्रकरणातील डॉक्टरही आले रडारवर – गर्भलिंग निदान चाचणी केल्यानंतर ज्या डॉक्टरांकडे पुढील प्रक्रिया केली जायची ते डॉक्टरहीआता रडारवर आले असून यातील अतुल अंकुश जाधव या डॉक्टरला यवत पोलिसांनी अटक करत गिरी सोबत न्यायालयात हजर केले असता त्या डॉक्टरलाही पाच दिवसांची पोलिस कोठडी देण्यात आली आहे. या प्रकरणात अनेक एजंट, ब्लॅकमेलर आणि डॉक्टर असण्याची शक्यता वर्तवली जात असून लवकरच या सर्वांचा भांडाफोड होणार आहे.
