केडगाव : दौंड तालुक्यातील बोरिपार्धी येथील शेतजमिनीत बांधाच्या वादातून एकाच्या अंगावर ट्रॅक्टर घालून ट्रॅक्टरचे मोठे चाक अंगावरून गेल्याने यातील फिर्यादी धनाजी मल्हारी नेवसे (रा.बोरिपार्धी, ता.दौंड) यांना गंभीर दुखापत झाली असून त्यांनी दिलेल्या फिर्यादीवरून दोघांवर सदोष मनुष्यवधाचा प्रयत्न केल्याच्या आरोपाखाली गुन्हा दाखल करण्यात आला आहे.
पोलिसांकडून मिळालेल्या माहितीनुसार, दि.२० मे रोजी फिर्यादी धनाजी नेवसे हे आपल्या शेतामधील पिकास औषध फवारणी करण्यास गेले असता तेथे आरोपी विलास शंकर दिवेकर आणि रवींद्र विलास दिवेकर (दोघे रा.वरवंड, ता.दौंड) हे शेतातील सामायिक बांध ट्रॅक्टरने नांगरत असल्याचे त्यांना दिसले. यावेळी त्यांनी तुम्ही सामायिक बांध का नांगरता अशी विचारणा केली असता वरील आरोपिंनी त्यांना शिवीगाळ करत लाथा, बुक्क्यांनी मारहाण केली आणि पुन्हा बांध नांगरु लागले.
यानंतर नेवसे यांनी सामायिक बांधावर उभे राहून सामायिक बांध नांगरू नका असे सांगत असताना आरोपिंनी फिर्यादीच्या अंगावर ट्रॅक्टर घातल्याने त्या ट्रॅक्टरचे मोठे चाक त्यांच्या अंगावरून जाऊन त्यांना जबरदस्त दुखापत झाली. ट्रॅक्टर अंगावर घातल्याने नेवसे यांचा जीव जाऊ शकतो हे माहित असतानाही त्यांच्या अंगावर ट्रॅक्टर घालून त्यांना जीवे मारण्याचा प्रयत्नकरण्यात आला असे फिर्यादित नमूद करण्यात आले आहे. यवत पोलिसांनी वरील दोन आरोपिंवर सदोष मनुष्य वधाचा प्रयत्न करण्याच्या आरोपाखाली गुन्हा दाखल केला असून पुढील तपास पोलिस उपनिरीक्षक वागज करीत आहेत.
