पुणे : राष्ट्रवादीचे काँग्रेस शरदचंद्र पवार पक्षाचे प्रवक्ते विकास लवांडे यांना आज वाघोली पोलिसांकडून अटक करण्यात आली आहे. याबाबत त्यांनी स्वतः पोस्टच्या माध्यमातून याची माहिती दिली आहे. कालच खासदार सुप्रिया सुळे यांनी लवांडे यांना पोलिस संरक्षण देण्यात यावे अशी मागणी केली होती तर आज पोलिसांनीच त्यांना अटक केली आहे.नेमक्या कोणत्या गुन्ह्यात त्यांना अटक करण्यात आली याची माहिती अजून समजली नाही.
वाघोली पोलिस विकास लवांडे यांना पुण्यातून अटक करत असताना त्यांनी सोशल मिडियावर पोस्ट करत याची माहिती दिली. तसेच वाघोली पोलिसांवर लवांडे आरोप करत मला फोन न करता रात्री घरी आले, खोट्या प्रकरणात मला अटक करण्यात आली असा आरोप विकास लवांडे यांनी केला आहे. लवांडे यांनी पोलिसांच्या गाडीत बसलेला एक फोटो शेअर करत अटकेची माहिती दिली आहे.
लवांडे यांना पोलिसांनी अटक केल्यानंतर त्यांनी एक्सवर पोस्ट करत, पुणे पोलिसांची चोर सोडून संन्याशाला फाशी.. माझ्यावर जीवघेणा हल्ला करणारे गुंड भंडारे आणि इतर सर्व आरोपी मोकाट आहेत. वाघोली पोलीस स्टेशनचे पोलीस एका खोट्या फिर्यादीवरून कसलाही पुरावा नसताना मला अटक करण्यासाठी फोन न करता रात्री घरी आले असे त्यांनी म्हटले आहे.
