पुणे : बी. टी. शहानी नविन हिंद ग्रुप ऑफ स्कूल्स अँड ज्युनियर कॉलेज, पुणे येथे आंतरराष्ट्रीय दर्जाच्या भव्य क्रीडांगणाचे उत्साहपूर्ण वातावरणात उद्घाटन करण्यात आले. या कार्यक्रमास विद्यार्थी, शिक्षक, मान्यवर पाहुणे, सन्माननीय अतिथी तसेच कराची एज्युकेशन सोसायटीच्या व्यवस्थापन समितीचे सदस्य आवर्जून उपस्थित होते.
या कार्यक्रमाच्या सुरुवातीला आंतरराष्ट्रीय दर्जाच्या क्रीडांगणाचे उद्घाटन आलेल्या मान्यवरांच्या हस्ते रिबन कापून करण्यात आले. हे क्रीडांगण बेकार्ट यांच्या प्रायोजकत्वाखाली आणि राउंड टेबल इंडिया यांच्या सहकार्याने उभारण्यात आले आहे. हा उपक्रम विद्यार्थ्यांमध्ये शारीरिक तंदुरुस्ती, संघभावना आणि क्रीडा उत्कृष्टतेला चालना देणारा ठरणार आहे. कार्यक्रमावेळी विद्यार्थ्यांनी सादर केलेल्या सिंधी नृत्याने कार्यक्रमात सांस्कृतिक अभिमान आणि रंगत निर्माण केली तर मुख्य पाहुण्यांनी आपल्या भाषणातून विद्यार्थ्यांच्या सर्वांगीण विकासात क्रीडा व शारीरिक शिक्षणाचे महत्त्व अधोरेखित केले. बेकार्ट आणि राउंड टेबल इंडिया यांनी जागतिक दर्जाचे क्रीडा सुविधा उपलब्ध करून देण्यासाठी घेतलेल्या पुढाकाराचे कौतुक करण्यात आले.
या कार्यक्रमाला आमदार श्री. सुनील कांबळे, श्री. विशाल धनावडे, नगरसेवक, पीएमसी, सौ. सायली आवचट, एचआर प्रमुख, बेकार्ट, इंडिया, श्री. देवेंद्र मिश्रा, वित्त संचालक, बेकार्ट, इंडिया, श्री. सुमीत गुप्ता, एरिया चेअरमन, राउंड टेबल इंडिया, श्री. ऋषभ पटोदिया, एरिया व्हाइस चेअरमन, राउंड टेबल इंडिया, कु. पायल राजपाल, संचालक, रोबोटेक्स इंडिया हे आवर्जून उपस्थित होते.
या कार्यक्रमाला अधिक रंगत आणण्यासाठी मान्यवर आणि विद्यार्थ्यांमध्ये क्रिकेट आणि फुटबॉलचे मैत्रीपूर्ण सामने आयोजित करण्यात आले, ज्यामुळे उपस्थित सर्वांमध्ये आनंद आणि उत्साहाचे वातावरण निर्माण झाले. कार्यक्रमाचा समारोप सौ. कविता देशपांडे (प्राचार्य, हायस्कूल) यांच्या आभार प्रदर्शनाने झाला. त्यांनी सर्व मान्यवर, आयोजक, कराची एज्युकेशन सोसायटीच्या व्यवस्थापन समितीचे सदस्य श्री. चित्रेश भाटिया (कोषाध्यक्ष, KES), श्री. दीपक रामनानी (सचिव, KES), सौ. गुलसन गिडवानी (सदस्य, KES), श्री. सुरेश रोहरा आणि श्री. गिर्धर लुल्ला (सदस्य, KES) यांच्या मार्गदर्शनाबद्दल तसेच सर्व सहभागींचे मनःपूर्वक आभार मानले.
या क्रीडांगणाच्या उद्घाटनामुळे विद्यार्थ्यांमधील कौशल्य विकास, क्रीडा संस्कार आणि निरोगी जीवनशैलीला प्रोत्साहन मिळणार असून हा एक महत्त्वाचा टप्पा ठरणार आहे.
