शिरुर : शिरूर येथे एटीएसने मोठी कारवाई करत मॅफेड्रॉन ड्रग्ज विक्री करणाऱ्या दोघांना जेरबंद केले आहे. ही कारवाई पुणे ग्रामीण दहशतवाद विरोधी पथक (एटीएस) ने केली असून मंगळवार दिनांक ७ मार्च रोजी पुणे जिल्ह्यातील शिरूर परिसरात हा छापा टाकण्यात आला होता. या छाप्यात मॅफेड्रॉन (एमडी ड्रग्ज) हे अमली पदार्थ आणि ते विक्री करणारे २ तरुणांना ताब्यात ताब्यात घेऊन सुमारे एक लाख रुपये किमतीचा मुद्देमाल हस्तगत करण्यात आला आहे.
रांजणगाव एमआयडीसी व शिरूर परिसरात सध्या एमडी ड्रग्स सारख्या अत्यंत घातक अमली पदार्थाच्या विळख्यात अनेक तरुण व्यसनाधीन झाल्याचे धक्कादायक चित्र समोर येत होते. याची माहिती प्रसिद्धी माध्यमांवर सुद्धा प्रसारित झाली होती. या प्रकाराची तात्काळ दखल घेऊन पुणे जिल्हा पोलीस अधीक्षक संदीपसिंह गिल यांनी दहशतवादी विरोधी पथकास कारवाई करणे बाबत आदेश दिलेले होते.
पोलीस अधीक्षकांचे आदेश येताच पुणे ग्रामीण दहशतवाद विरोधी पथक हे रांजणगाव व शिरूर परिसरांमध्ये वेशांतर करून अमली पदार्थाची अवैध विक्री व साठा याबाबत माहिती काढत होते. सदर पथकास एका खबऱ्यामार्फत शिरूर हद्दीत पुणे-अहिल्यानगर हायवे लगत एका एम्पायर नावाचे पान टपरीवर एक तरुण एमडी ड्रग्ज अंमली पदार्थ साठा करून त्याची ओळखीच्या लोकांना विक्री करत आहे अशी खात्रीदायक माहिती मिळाली.
त्याप्रमाणे दहशतवादी विरोधी पथकाने शिरूर पोलीस स्टेशनकडील स्टाफसह साध्या वेशात सदर ठिकाणी छापा टाकून एमडी नावाचे अमली पदार्थ विकणारे (१) साहील संदीप करंजुले (वय २० रा.पाडळी रांजणगाव ता.पारनेर जि.अहिल्यानगर) (२) ओंकार संजय धावडे (वय २३ रा.रामलिंग रोड, शिरूर ता.शिरूर जि. पुणे) असे २ तरुणांना ताब्यात घेवुन त्यांच्याकडून सुमारे १ लाख ४ हजार रुपये किंमतीचा विक्रीसाठी बाळगण्यात आलेला एमडी ड्रग्ज नावाचा अमली पदार्थ साठा जप्त करण्यात आला आहे. सदर दोघे आरोपी यांचेवर शिरूर पोलीस स्टेशन येथे अमली पदार्थ कायद्याअंतर्गत गुन्हा दाखल करण्यात आलेला असून त्यांना पुढील कारवाईसाठी शिरूर पोलीस स्टेशनच्या ताब्यात देण्यात आलेले आहे.
सदर कामगिरी ही पुणे जिल्हा पोलीस अधीक्षक संदीपसिंह गिल्ल, अपर पोलीस अधीक्षक रमेश चोपडे, उपविभागीय पोलीस अधिकारी प्रशांत ढोले, शिरूर पोलीस स्टेशनचे प्रभारी पोलीस निरीक्षक हेमंत शेडगे यांच्या मार्गदर्शनाखाली दहशतवाद विरोधी शाखेचे सहाय्यक पोलीस निरीक्षक प्रकाश पवार, सहाय्यक पोलीस उपनिरीक्षक महेश गायकवाड, विशाल गव्हाणे, पोलीस हवालदार निलेश कदम, रवींद्र जाधव, मोसीन शेख, ओंकार शिंदे, जालिंदर मुळीक, तसेच शिरूर पोलीस स्टेशनचे पोलीस उपनिरीक्षक हनुमंत नकाते, पोलीस हवालदार नितीन सुद्रीक, राहुल भवर, पवन तायडे यांचे पथकांने केलेली आहे.
सदर आरोपींना कोर्टासमोर हजर केले असता पाच दिवस पोलीस कस्टडी रिमांड देण्यात आलेली आहे. आरोपींनी सदरचे अमली पदार्थ कोठून आणले? अमली पदार्थ रॅकेटचे सूत्रधार कोण आहेत? याबाबत पुढील अधिक तपास शिरूर पोलीस स्टेशनचे पोलीस उपनिरीक्षक हनुमंत नकाते हे करीत आहेत.
