केडगाव, दौंड : दौंड तालुक्यातील केडगाव येथे कृषी उत्पन्न बाजार समितीमध्ये भाड्याने घेतलेल्या गाळ्यामध्ये सरकारी रेशनचा माल ठेवून तो आपल्या ओळखीच्या गिऱ्हाईकांना विकण्याचा प्रयत्न करणाऱ्या इसमाला रंगेहात पकडण्यात पोलीस आणि महसूल पथकाला यश आले आहे.
याबाबत पोलिस स्टेशन येथे जिवनावश्यक वस्तु कायदा कलम 3 व 7 प्रमाणे गुन्हा दाखल करण्यात आला असून फिर्यादी पंकज गोपाळ गोरे (वय 34 वर्षे, व्यवसाय नोकरी (पुरवठा निरीक्षक, दौड तहसिल) यांनी फिर्याद दिली आहे. गोरे यांच्या फिर्यादीवरून आरोपी सुनिल विश्वनाथ निंबाळकर (रा. केडगाव, ता. दौंड, जि. पुणे) यांच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार दि. 07/04/2026 रोजी सकाळी 10:45 ते सायंकाळी 19:45 च्या दरम्यान केडगाव, ता. दौंड या गावच्या हद्दीत असणाऱ्या कृषी उत्पन्न बाजार समिती, केडगाव येथील गाळ्यामध्ये यातील आरोपी सुनिल निंबाळकर याने कृषी उत्पन्न बाजार समिती, केडगाव यांचेकडुन भाडोत्री घेतलेल्या गाळयात घाऊक व्यापाराचे अनुज्ञप्ती आदेश खंड 4(2) हा जिन्नस साठवणुक करण्याचे लायसन्सची मुदत सन 2017 व 2018 मध्येच संपलेली असतानाही सदर गाळ्यात पांढरे रंगाचे नायलॉनचे 45 ते 50 किलोग्रॅम वजनाचे एकूण 492 कट्टे गहु ज्याची किंमत 8,85,600/- रुपये व 45 ते 50 किलोग्रॅम वजनाचे एकुण 144 पांढरे रंगाचे नायलॉनचे कट्टे तांदुळ ज्याची किंमत 2,84,256/- रुपये असा एकुण किंमत 10 लाख 69 हजार 856 रुपये किंमतीचा सरकारमान्य रास्त भाव दुकानातील माल प्रथमदर्शनी आपले ओळखीचे गिऱ्हाईकांना काळ्या बाजाराने विक्री करण्याचे उद्देशाने बाळगला असताना मिळून आला असल्याने गुन्हा दाखल करण्यात आला आहे.
या घटनेचा पुढील तपास यवत पोलीस स्टेशन चे पोलीस निरीक्षक नारायण देशमुख यांच्या मार्गदर्शनाखाली पोलीस उपनिरीक्षक वागज हे करीत आहेत.
