केडगाव, दौंड : दौंड तालुक्यातील चौफुला येथे 20 लाख रुपये किंमतीचा गांजा आणि वाहन असा मुद्देमाल जप्त करण्यात यवत पोलिसांना यश आले आहे. ही घटना 31/03/2026 रोजी रात्री 11:15 च्या सुमारास पुणे- सोलापूर हायवे रोडवर धायगुडेवाडी ता. दौंड या गावच्या हद्दीत असणाऱ्या होटेल दुर्गा समोर घडली आहे. याबाबत गुरुनाथ युवराज गायकवाड, (पो. हवा./1929, वय 42 वर्षे, नेमणूक यवत पोलीस स्टेशन, पुणे ग्रामीण) यांनी फिर्याद दिली आहे.
यवत पोलिसांनी या कारवाईत आरोपी 1) शाकीर शब्बीर पानसरे, (मूळ रा. तालमीसमोर येवलेवाडी, ता. हवेली जि.पुणे सध्या रा. अहिल्यादेवी चौक चोरमले बिल्डींग सुपे ता. बारामती जि. पुणे) आणि आरोपी 2) समाधान शिवाजी दाभाडे, (रा. अंतुलेनगर येवलेवाडी, ता. हवेली जि.पुणे) यांच्यावर गुन्हा दाखल करत त्यांना अटक केली आहे.
या कारवाईत 29.600 किलो ग्रॅम गांजा ज्याची किंमत 14,50,000/- रुपये असून 5,50,000/- रुपये किंमतीची एक पांढ-या रंगाची मारूती सुझुकी कंपनीची बलेनो गाडी असा एकूण 20,30,000/- रूपये किमतीचा माल जप्त करण्यात आला आहे. घटनेचा पुढील तपास यवतचे पोलीस निरीक्षक नारायण देशमुख यांच्या मार्गदर्शनाखाली सपोनि महेश माने हे करीत आहेत.
