दौंड : आपले मत म्हणजे दादांना खरी श्रद्धांजली असे म्हणून मते मागणाऱ्यांनी निवडून येताच गुलालाची बेसुमार उधळण अण डीजे चा दणदणाट सुरु केल्याने नागरिकांनी संताप व्यक्त केला आहे. दादांना श्रद्धांजली म्हणून नेमकी मते मागत होतात की स्वतःची राजकीय पोळी भाजायची होती अशी प्रतिक्रिया अनेक नागरिकांनी दिली आहे.
काल जिल्हा परिषद आणि पंचायत समितीचा निकाल लागणार होता. मतदानाच्या दिवसापर्यंत एकदम शांत आणि धीरगांभीर चेहरा घेऊन फिरणाऱ्या उमेदवार आणि कार्यकर्त्यांनी निकाल लागताच अचानक चेहऱ्यावरील हावभाव बदलले. गाडीवर उभे राहून, नाचून अण अंगावर गुलाल घेत थेट डीजे च्या तालावर अनेकजण दंड थोपटू लागले. हा सर्व प्रकार पाहून ज्यांनी श्रद्धांजली म्हणून मते दिली त्यांचा मात्र पुरता हिरमोड झाल्याचे पहायला मिळाले.
घटना काय घडली आहे, त्यानंतर वातावरण काय आहे आणि आपण काय करतोय याचे भान सुद्धा काहींना राहिले नाही. काहींनी तर ज्या ठिकाणी विरोधकांची घरे आहेत त्या ठिकाणी डीजे थांबवून जोरात माकड डान्स केल्याचेही पहायला मिळाले. याबाबत काहींना हटकले असता जाऊद्या राव अनेक वर्षांनंतर आता कुठे गुलाल उधळायची संधी मिळाली आहे असे म्हणत यांना घटनेचे कसलेच गांभीर्य नाही हे दाखवून दिले.
अनेकांनी या सर्व प्रकारावर सोशल मीडियावर आपली नाराजी पोस्ट च्या माध्यमातून बोलून दाखवली. त्यामुळे निवडून येईपर्यंत ‘आपले एक मत म्हणजे खरी श्रद्धांजली’ असे भावनिक आवाहन करणाऱ्यांचे अचानक चेहऱ्याचे हावभाव बदलून त्यात विजयाचा उन्माद नागरिकांना पहायला मिळाल्याने अनेकांनी नाराजी व्यक्त केली.
