दौंड तालुका : दौंड तालुक्यात जिल्हा परिषद आणि पंचायत समितीची निवडणूक अत्यंत चूरशीची झाल्याचे पहायला मिळत आहे. याच निवडणुकीच्या निकालासाठी आज सकाळी १० वाजल्यापासून मतमोजणी सुरु होणार आहे.
दौंड तालुक्यात सात जिल्हा परिषद गट आणि चौदा पंचायत समिती गण आहेत. यापैकी बोरिपार्धी – केडगाव गटाकडे सर्वाधिक लक्ष लागून राहीले असून या ठिकाणी माजी आमदार रमेश थोरात यांचे पुत्र तुषार थोरात विरुद्ध भीमा पाटस कारखान्याचे माजी उपाध्यक्ष आनंद थोरात यांचे पुत्र अभिषेक थोरात यांच्यामध्ये काटे की टक्कर पहायला मिळत आहे. या ठिकाणी कोण जिंकणार यावर अनेकजण आपापल्या परीने आकडे मोड करताना दिसत आहेत.
तालुक्यात अश्याच पद्धतीने इतर अन्य गटांमध्येही मोठी चुरस दिसत असून दुसऱ्या नंबरला रोमहर्षक लढतीमध्ये खडकी – देऊळगाव राजे या गटाचा समावेश होत असून या गटामध्ये भाजप उमेदवार माजी पंचायत समिती सभापती आप्पासाहेब पवार विरुद्ध राष्ट्रवादी काँग्रेस चे जिल्हा परिषद सदस्य विरधवल जगदाळे यांच्यामध्ये काटे की टक्कर पहायला मिळत आहे. याठिकाणी अपक्षांनीही कंबर कसल्याचे दिसत असून या जागेवर कोण विजयी होणार याबाबत वेगवेगळी गणिते मांडली जात आहेत.
यानंतर वरवंड – पारगाव, पाटस – कुरकुंभ, यवत – बोरीभडक, राहू – खामगाव, गोपाळवाडी – कानगाव या गटांकडेही नागरिकांचे विशेष लक्ष लागून राहिले आहे. या सर्व गटांचे आणि गणांचे निकाल आज जाहीर होणार असून आज सकाळी दहा वाजता मतमोजणीला सुरुवात होत आहे. साधारण तासाभरातच सर्व चित्र स्पष्ट होणार असून कोण गुलाल उधळणार आणि कोण आपल्या गटात चिंतन करणार यावर सर्वांच्या नजरा खिळून आहेत.
