पुरंदर : पुणे ग्रामीण च्या जेजुरी पोलीस ठाण्यात तक्रार दिलेल्या इसमास दोन हजारांच्या लाचेची मागणी करुन ती स्विकारताना खाजगी इसम आणि पोलीस हवालदाराला ताब्यात घेण्यात आले आहे. दशरथ शिवाजी बनसोडे (पोलीस हवालदार, जेजुरी पोलीस स्टेशन, पुणे) आणि खाजगी इसमसचिन अरविंद चव्हाण (रा.वाल्हा, ता.पुरंदर, पुणे) अशी या आरोपिंची नावे आहेत.
मिळालेल्या माहितीनुसार तक्रारदार यांच्या मुलाने सन 2019 मध्ये एका इसमाविरोधात जेजुरी पोलीस ठाणे येथे सावकारकीच्या कायद्याखाली गुन्हा दाखल केला होता. त्या गुन्ह्यामध्ये तक्रारदार व तक्रादाराची पत्नी असे दोन साक्षीदार होते. दि.5/12/2025 रोजी खाजगी इसम सचिन चव्हाण व पोलीस हवालदार दशरथ बनसोडे हे तक्रारदाराच्या घरी आले होते. तेव्हा त्यांनी तक्रारदार व तक्रारदाराची पत्नी विरुद्ध 2019 मध्ये तक्रारदाराच्या मुलाने दाखल केलेल्या गुन्ह्यामध्ये गेट वॉरंट निघालेले असून ते रद्द करण्यासाठी दोन हजार रुपयांची लाच मागितल्याची तक्रार तक्रारदार यांनी दि.10/12/2025 रोजी लाचलुचपत प्रतिबंधक विभाग पुणे येथे दिली होती.
तक्रारदाराच्या प्राप्त तक्रारीच्या अनुषंगाने श्रीमती भारती मोरे (सहा. पोलीस आयुक्त लाचलूचपत विभाग,पुणे) यांच्या पथकाने लाच मागणी पडताळणी कारवाई केली असता पडताळणी दरम्यान आरोपी लोकसेवक पोलीस हवालदार दशरथ शिवाजी बनसोडे याने तक्रारदाराकडे त्यांच्या व त्यांची पत्नी विरुद्ध निघालेले जामीनपात्र वॉरंट रद्द करून देण्यासाठी 2 हजार रुपयांची लाच मागितल्याचे निष्पन्न झाले.
तसेच सचिन चव्हाण (खाजगी इसम) याने तक्रारदारास लाच देण्यासाठी प्रोत्साहन दिल्याचे निष्पन्न झाले असून दोन्ही आरोपींना ताब्यात घेऊन त्यांच्याविरुद्ध जेजरी पोलीस ठाणे इथे गुन्हा दाखल करण्यात आला असून पुढील तपास श्रीमती शैलजा शिंदे, पोलीस निरीक्षक (लाचलुचपत, विभाग,पुणे) या करीत आहेत.
