अब्बास शेख
पुणे : सर्वांचे लक्ष लागून राहिलेल्या जिल्हापरिषद आणि पंचायत समितीच्या गट आणि गणांचे आरक्षण आज जाहीर होणार आहे. जिल्हाधिकारी जितेंद्र डुडी यांच्या अध्यक्षतेखाली जिल्हा परिषदेतील ७३ सदस्यांच्या पदाकरिता ही आरक्षण सोडत आज दुपारी १२ वाजता होणार आहे.
मात्र अनेकांना अजून हेच माहित नाही की हे आरक्षण नेमके कोठे जाहीर केले जाणार आहे. तर पुणे जिल्हा परिषदेचे आरक्षण हे बहुउद्देशीय सभागृह, ५ वा मजला, जिल्हाधिकारी कार्यालय या ठिकाणी आयोजित करण्यात आले असून पंचायत समिती सदस्य पदांकरिता आरक्षण सोडतीचे आयोजन खालील प्रमाणे संबंधित तालुक्यात असणाऱ्या या ठिकानांवर करण्यात आले आहे.
महाराष्ट्र जिल्हा परिषद व पंचायत समिती अधिनियम, १९६१ व महाराष्ट्र जिल्हा परिषदा आणि पंचायत समित्या (जागांच्या आरक्षणाची पद्धत व चक्रानुक्रम) नियम २०२५ नुसार जिल्हा परिषद व पंचायत समिती क्षेत्रात सभा घेऊन अनुसूचित जाती, अनुसूचित जमाती, नागरिकांचा मागासवर्ग प्रवर्ग व त्यामधील स्त्रियांसाठी राखून ठेवावयाच्या जागा आणि सर्वसाधारण स्त्रियांसाठी राखून ठेवावयाच्या जागा निश्चित करावयाच्या आहेत.
जुन्नर, आंबेगाव, खेड, मुळशी, वेल्हे आणि पुरंदर पंचायत समितीची आरक्षण सोडत संबंधित पंचायत समिती कार्यालयाच्या सभागृहात आयोजित करण्यात आली आहे. तर शिरूर पंचायत समितीची सोडत नवीन प्रशासकीय इमारत, तहसील कार्यालय, शिरूर. मावळ पंचायत समिती – भेगडे लॉन्स, वडगांव मावळ, ता.मावळ. हवेली – उद्यान प्रसाद कार्यालय, १७१२/१ बी, सी व्ही जोशी मार्ग, खजिना विहीर चौक, माडीवाले कॉलनी, सदाशिव पेठ,
दौंड पंचायत समिती – बैठक सभागृह, दुसरा मजला, नविन प्रशासकीय इमारत, तहसील कार्यालय, दौंड. भोर – अभिजीत मंगल कार्यालय, भोर महाड रस्ता, भोर. बारामती पंचायत समिती- कवी मोरोपंत सभागृह, इंदापूर रस्ता, बारामती. आणि इंदापूर पंचायत समितीची आरक्षण सोडत राधिका रेसिडेन्सी क्लब, इंदापूर येथे आयोजित करण्यात येणार आहे.
