छत्तीसगड : छत्तीसगड येथील विजापूर-सुकमा सीमेवर नक्षलवाद्यांनी केलेल्या गोळीबारात 3 जवान शहीद झाले आहेत तर 15 जवान जखमी झाले आहेत.
आयजी पी सुकमा यांच्याकडून मिळालेल्या अधिक माहितीनुसार, विजापूर-सुकमा सीमेवर जोनागुडा आणि अलिगुडाजवळ नक्षलवाद्यांसोबत झालेल्या गोळीबाराबाबत 3 जवान शहीद झाले तर 15 जवान जखमी झाले आहेत. मात्र आपल्या जवानांनी नक्षलवाद्यांच्या गोळीबाराला चोख प्रत्युत्तर दिले असून यात किमान 6 नक्षलवादी ठार झाले असावेत असा दावा त्यांनी केला आहे. दबा धरून बसलेल्या नक्षलवाद्यांनी जवानांच्या कॅम्पवर जोरदार फायरिंग सुरु केली. जवानांनी दिलेल्या प्रतिउत्तरात सहा कॅडर नक्षलवाद्यांचा मृत्यू झाला असण्याची शक्यता आहे असे त्यांनी सांगितले आहे.
नक्षलवाद्यांनी केलेल्या हल्ल्यात यातील तिघेही जवान गंभीर जखमी झाले होते. उपचार करण्यास घेऊन जात असताना ते शहीद झाले. जखमी झालेल्या 15 जवानांना रायपूरच्या रुग्णालयात नेण्यात आले असून तेथे त्यांच्यावर उपचार सुरू आहेत. जखमी जवानांची प्रकृती स्थिर आहे.
